Թինա Մալխասյանը մարտի 16-ից` Հովհաննիսյանի հացադուլը սկսելու հաջորդ օրվանից ամեն օր զննում է նրան:
«Դա ևս վտանգավոր է, պետք է օրական 2-3 լիտր հեղուկ օգտագործի, քանի որ բացի ջրից ուրիշ ոչինչ չի ընդունում», - ասաց Մալխասյանը` հավելելով, որ հացադուլը շարունակելու դեպքում «Ժառանգության» առաջնորդի մոտ կարող են խնդիրներ առաջանալ լյարդի, երիկամների, տեսողության հետ. - «Չնայած նման նշաններ դեռ չկան, բայց վտանգը մեծանում է», - հավելեց նա:
Ըստ բժշկուհու` հացադուլ անող մարդը միայն առաջին 4 օրերի ընթացքում է սով զգում, այսինքն Հովհաննիսյանը այլևս սովի զգացողություն չունի:
Րաֆֆի Հովհաննիսյանը, իր հերթին, «Ազատություն» ռադիոկայանին ասաց, թե կշարունակի իր ամենօրյա հանդիպումները բժշկի հետ:
«Եվ եթե երբևէ առողջության խնդիրը դառնա կրիտիկական, ես, իհարկե, կվերանայեմ: Բայց ներկա դրությամբ ամեն ինչ կայուն է, 15-րդ օրն ենք մտնում և բացառությամբ մորուքիս սպիտակներից, ամեն ինչ անփոփոխ է: Կշարունակեմ հացադուլը, քանի դեռ իմ կամքը ներում է, և ես իմ որոշումը կկայացնեմ, ոչ թե ուրիշ մարդ` լինի աշխարհիկ, թե հոգևորական: Երբ այդ պահը հնչի, տեղյակ կլինեք, ես կկիսվեմ իմ համաքաղաքացիների հետ», - ասաց Հովհաննիսյանը:
Մարդկանց այցելությունները շարունակվում են Ազատության հրապարակ` շարքային քաղաքացիները, պատգամավորները, քաղաքական գործիչները, մտավորականները շարունակում են ողջունել Րաֆֆի Հովհաննիսյանին և իրենց զորակցությունը հայտնել նրան:
Այսօր Րաֆֆի Հովհաննիսյանին ողջունելու էին եկել մի քանի տասնյակ դպրոցականներ: Նշելով, որ լավ են հասկանում նրա կոչերը, մասնավորապես իշխանությունը վերադարձնել ժողովրդին, ձերբազատվել կոռուպցիայից, կասեցնել արտագաղթը, վերացնել անարդարությունը, միտված են երիտասարդ սերնդի արժանապատիվ ապագայի ապահովման, դպրոցականները հորդորեցին նրան դադարեցնել հացադուլը և գործունեությունը շարունակել այլ ատյաններում:
Րաֆֆի Հովհաննիսյանն ասաց, թե վաղը ամենայն հավանականությամբ կկարողանա ավելի ամբողջական պատասխան տալ երիտասարդ սերնդին:
«Ես հավատում եմ, որ իմ այս փոքր քայլ-ահազանգը Ազատության հրապարակում, արել եմ ոչ թե մեծ փոփոխություններ բերելու համար, այլ որպեսզի բոլորը` իշխանությունը, ընդդիմությունը, հասարակությունը և երիտասարդությունը հասկանան, որ այսպես շարունակել չեն կարող: Մեզ այսօր պետք են նոր լուծումներ, որ ձեզ բերելու են ավելի լավ, ավելի երաշխավորված և ավելի արժանավայել ապագա», - ասաց Հովհաննիսյանը:
Նա չմանրամասնեց, թե վաղը ինչի մասին է խոսելու: Համաձայն «Ժառանգություն» կուսակցության տարածած հաղորդագրության` վաղը «Ծոմ Ազատության» հացադուլի 15-րդ օրը բոլորած Րաֆֆի Հովհաննիսյանը Ազատության հրապարակում խոսքով կդիմի համաքաղաքացիներին:
Fuente: azatutyun.am
0 Response to 'Բժիշկը մտահոգված է Րաֆֆի Հովհաննիսյանի առողջական վիճակով'
Publicar un comentario