Ռուսաստանյան «Նովոստի» լրատվական գործակալության փոխանցմամբ` փաստաթղթում ասված է, որ երեք պետությունների ղեկավարները քննարկել են 2010 թվականի հոկտեմբերի 27-ին Աստրախանում կայացած նախորդ հանդիպման ժամանակ ընդունված եռակողմ հայտարարության գործնական իրականացման հարցերը:
Բացի այդ, փաստաթղթում ընդգծվում է «բոլոր վիճելի հարցերը խաղաղ միջոցներով լուծելու և հրադադարի գծի երկայնքով հնարավոր միջադեպերի` կողմերի մասնակցությամբ, ԵԱՀԿ-ի Մինսկի խմբի համանախագահների հովանու ներքո, ԵԱՀԿ-ի գործող նախագահի հատուկ ներկայացուցչի աջակցությամբ հետաքննություն անցկացնելու ձգտումը»:
«Նախագահները նշեցին Լեռնային Ղարաբաղի հակամարտության կարգավորման հարցերով իրենց կանոնավոր շփումների կարևոր նշանակությունը և պայմանավորվեցին դրանք շարունակել նույն ձևաչափով` ի լրումն ԵԱՀԿ-ի Մինսկի խմբի համանախագահների աշխատանքի», - ասված է հայտարարությունում:
Բանակցությունների պաշտոնական մասը Սոչիում մեկնարկել էր տեղական ժամանակով կեսօրից քիչ անց: Ավելի քան երեք ժամ անց հաղորդվեց, որ նախագահների շփումները շարունակվում են ոչ պաշտոնական ձևաչափով:
Հանդիպման պաշտոնական մասից հետո Դմիտրի Մեդվեդևը, Սերժ Սարգսյանը և Իլհամ Ալիևը հանդիպել են Կրասնայի Պոլյանայի լեռնադահուկային լանջերից մեկի ստորոտում, որտեղ սուրճ են խմել, ապա ճոպանուղով վեր են բարձրացել: Մեդվեդևը և Ալիևը դահուկներով մի քանի անգամ վայրէջք են կատարել, Սարգսյանը ձնագնաց է վարել:
Այնուհետև, «Նովոստի»-ի վկայությամբ, երեք երկրների ղեկավարները շարունակել են հրատապ հարցերի քննարկումը աշխատանքային ճաշի սեղանի շուրջ:
Ադրբեջանի նախագահների արդեն 8-րդ եռակողմ հանդիպումն էր:
Երեք երկրների նախագահները 2010 թվականի հունվարի 25-ին` նույնպես Ռուսաստանի նախագահի նախաձեռնությամբ, արդեն հանդիպել էին Սոչիում: Այդ հանդիպումը ևս կայացել էր Կրասնայա Պոլյանայում:
Վերջին անգամ եռակողմ ձևաչափով նախագահները հանդիպել էին անցած տարվա հոկտեմբերի 27-ին ռուսաստանյան Աստրախան քաղաքում, որտեղ համատեղ հայտարարություն էր ընդունվել. կողմերը պայմանավորվել էին, մասնավորապես, ռազմագերիներին փոխանակելու եւ զոհվածների մարմինները վերադարձնելու մասին:
Սոչիի այս հանդիպման նախօրեին Լեռնային Ղարաբաղի և Ադրբեջանի զորքերի շփման գծում ադրբեջանցի դիպուկահարի կրակոցից զոհվել է Ղարաբաղի Պաշտպանության բանակի 20-ամյա զինծառայող Գրիգոր Շախկանյանը:
Դեպքի կապակցությամբ Հայաստանի արտգործնախարարությունը հայտարարեց, մասնավորապես, որ «Ռուսաստանի Դաշնության նախագահի նախաձեռնությամբ և ներկայությամբ Հայաստանի ևԱդրբեջանի նախագահների Սոչիում կայանալիք հերթական հանդիպման նախաշեմին, միջազգային հանրության, ԵԱՀԿ-ի Մինսկի խմբի համանախագահների` դիպուկահարներին շփման գծից դուրս բերելու վերաբերյալ շարունակական կոչերին համաձայնելու և իրագործելու փոխարեն, Ադրբեջանը գնում է հերթական սադրանքին` փորձելով լարել մթնոլորտը նախագահական հանդիպումից առաջ»:
Աղբյուրը` http://www.azatutyun.am