Գրեթե բոլոր լրատվամիջոցներն անդրադառնում են Պակիստանում ամերիկացիների կողմից իրականացված հատուկ գործողության մանրամասներին, սակայն Guardian–ը գրում է, որ «դա 2001–ից ի վեր տարվող ահաբեկչության դեմ պայքարում շրջադարձային պահ է » և որ սրա հետևանքները հետագայում աշխարհով մեկ իրենց զգացնել կտան։
Guardian–ի կարծիքով՝ «համար առաջին ահաբեկչի» մահվան մասին լուրն ամենայն հավանականությամբ կապահովի 2012–ին ԱՄՆ նախագահ Բարաք Օբամայի վերընտրումը նախագահի պաշտոնում. Օբաման 2008–ի իր նախընտրական արշավում պարբերաբար ասում էր. «մենք կսպանենք Ուսամա բեն Լադենին»։
Պարբերականը մեջբերում է Պակիստանի մայրաքաղաք Իսլամաբադում արևմտյան անանուն դիվանագետին, որն ասել է, թե բեն Լադենի սպանությունը կփոխի ինչպես «Ալ Կաիդան», այնպես էլ՝ Պակիստանի և Աֆղանստանի հանդեպ ԱՄՆ–ի քաղաքականությունը։
Guardian–ի համաձայն՝ որոշ վերլուծաբաններ մտավախություն ունեն, որ «Ալ Կաիդայի» ղեկավարի սպանությունը կարող է արագացնել տարածաշրջանից ամերիկացի զորքերի դուրս բերումը՝ չնայած որ տալիբների հետ պատերազմը դեռ ավարտված չէ։
Հնարավոր է, որ փոխվեն նաև Պակիստանի և Վաշինգտոնի հարաբերությունները։
Այն, որ բեն Լադենը սպանվել է Աֆղանստանի սահմանից հեռու, հարց է առաջացնում, թե ինչպե՞ս է հաջողվել 2մ հասակ ունեցող այս մարդուն, որն արտաքնապես հայտնի է ամբողջ աշխարհին, այդքան երկար ժամանակ թաքնվել արդարադատությունից, գրում է պարբերականը։
Աղբյուրը` Թերթ.am
0 Response to 'Ի՞նչ հետևանքներ կարող է ունենալ բեն Լադենի սպանությունը. The Guardian'
Publicar un comentario