«Մայրենիի լավագույն ուսուցիչ» մրցույթը կազմակերպվում է` նկատի ունենալով Սփյուռքում հայեցի կրթության և դաստիարակության, ուծացման դեմ պայքարում ինքնությանն ու հայ ոգուն հավատարիմ հայ սերունդներ դաստիարակելու, 21-րդ դարի մարտահրավերների պայմաններում հայ երեխային հայ պահելու նվիրական գործում մայրենի լեզվի ուսուցչի առաքելությունը: Այն նպատակ ունի խրախուսել Սփյուռքում հայ ազգային ինքնության, մայրենի լեզվի պահպանման, զարգացման և տարածման, հայ սերնդի հայեցի կրթության և դաստիարակության գործում նշանակալի ավանդ ունեցող ուսուցիչներին, ներկայացնել և տարածել նրանց մանկավարժական և մասնագիտական առաջավոր փորձը Սփյուռքում, նպաստել սփյուռքահայության մեջ հայերենի ուսուցիչ-մանկավարժի հեղինակության բարձրացմանը:

«Մայրենիի լավագույն ուսուցիչ» մրցույթին կարող են մասնակցել Սփյուռքում գործող հայկական ամենօրյա և մեկօրյա կրթօջախների մայրենի լեզվի այն ուսուցիչները, որոնք
-աշխատում են տվյալ երկրի օրենսդրությանը համապատասխան գործող դպրոցում, (ամենօրյա, մեկօրյա) կամ տեղի հայկական կազմակերպությանը, եկեղեցական կառույցին կից մասնագիտացված կրթական հաստատությունում,
- ունեն առնվազն 3 տարվա աշխատանքային փորձ` որպես հայոց լեզվի ուսուցիչ:
Մրցույթին մասնակցել ցանկացող ուսուցիչները լրացված հայտադիմումները պետք է ներկայացնեն ՀՀ սփյուռքի նախարարություն մինչև ս. թ. հուլիսի 15-ը:
Հայտադիմումին կից անհրաժեշտ է ներկայացնել նաև
- լուսանկար,
- կրթության մասին փաստաթուղթ (պատճենը),
- բնութագիր-երաշխավորագիր տվյալ դպրոցի, կառույցի կամ համայնքի կողմից:
Մրցույթի արդյունքները կամփոփվեն 2011թ. սեպտեմբեր ամսին:

«Լավագույն երիտասարդական կազմակերպություն» մրցույթը կանցկացվի սփյուռքյան երիտասարդական կազմակերպությունների միջև:

Հասարակության շարժիչ ուժը երիտասարդներն են: Սփյուռքում գործող երիտասարդական կազմակերպություններն իրենց մասնակցությունն են ունենում երիտասարդությանն առնչվող կրթական, գիտական, մշակութային, տնտեսական, մարզական, քաղաքական հարցերին, կազմակերպում են քննարկումներ, համազգային նշանակության խնդիրների նկատմամբ միասնականություն են դրսևորում և փորձում են իրենց ներդրումն ունենալ տարբեր համահայկական ծրագրերի և միջոցառումների իրականացման գործում: Յուրաքանչյուր երիտասարդական կազմակերպություն ունի իր գործելակերպն ու սկզբունքները, առաքելությունն ու պատասխանատվությունը: Մրցույթը նպատակ ունի ոգևորել և խրախուսել սփյուռքյան և համահայկական երիտասարդական կազմակերպություններին` կարևորելով նրանց դերակատարությունը համահայկական և միջազգային խնդիրների լուծման գործում:
«Լավագույն երիտասարդական կազմակեր¬պութ¬յուն» մրցույթին կարող են մասնակցել Սփյուռքում գործող երիտասարդական կառույցները, որոնք
-գրանցված են տվյալ երկրի օրենսդրությանը համապատասխան կամ գործում են տեղի հայկական համայնքին, մշակութային, եկեղեցական կամ այլ հայկական կառույցին կից,
- ունեն առնվազն 3 տարվա գործունեության փորձ:

Լրացված հայտադիմումների` ՀՀ սփյուռքի նախարարություն ներկայացման վերջնաժամկետը հուլիսի 20-ն է:
Մրցույթի արդյունքները կամփոփվեն 2011թ. սեպտեմբեր ամսին:

«Կտոր մը Հայրենիք» երիտասարդական հայագիտական հետազոտությունների մրցանակաբաշխությունը նվիրված է Հայաստանի անկախության 20-ամյակին:
Բոլոր ժամանակներում հայ ստեղծագործ ու ճկուն մտքի շնորհիվ է հնարավոր եղել հայ ժողովրդի դիմակայումը ճակատագրի փորձություններին: Երիտասարդությունը, կայանալով այդ փորձությունների մասին գիտելիքներ ստանալով և նոր ժամանակներում նույն այդ փորձությունների ականատեսը լինելով, ձևավորում է իր աշխարհատեսությունն ու արժեքային համակարգը:

Յուրաքանչյուրն ունի Հայրենիքի իր ընկալումը, և այս հետազոտությունները հրաշալի հնարավորություն են ընձեռում ճանաչելու այն` երիտասարդության աչքերով:
Մրցանակաբաշխության նպատակն է վերհանել հայ երիտասարդի մտահոգությունները, Հայրենիքի ամրապնդմանն ու հզորացմանն ուղղված քայլերի կանխատեսումը, ևս մեկ անգամ հաստատել նրանց կարևորագույն դերակատարությունը հայոց պետականության զարգացման գործում:

«Կտոր մը Հայրենիք» երիտասարդական հայագիտական հետազոտությունների մրցույթին կարող են մասնակցել ուսանողներ, ասպիրանտներ և մինչև 35 տարեկան երիտասարդ գիտնականներ Հայաստանից և Սփյուռքից:
Մասնակցության համար լրացված հայտադիմումը և գիտական հետազոտությունը/աշխատանքը (հայերեն, մինչև 10 էջ ծավալով) պետք է ներկայացնել ՀՀ սփյուռքի նախարարություն մինչև ս. թ. սեպտեմբերի 5-ը:
Հայագիտական հետազոտության հետ անհրաժեշտ է ներկայացնել նաև ուսումնական հաստատության կամ գիտական կազմակերպության գրավոր կարծիքը հայտատուի գիտական աշխատանքի վերաբերյալ:
Յուրաքանչյուր անվանակարգի համար ՀՀ սփյուռքի նախարարության և Համաշխարհային հայկական կոնգրեսի կողմից ձևավորվում են մասնագիտական մրցութային հանձնաժողովներ, որոնք մշակում են հայտադիմումները, գնահատման չափանիշները, ինչպես նաև որոշում են մրցանակակիրներին: Բոլոր անվանակարգերում մրցանակակիրներից կպահանջվեն նաև բանկի տվյալներ (անվանում, հասցե, SWIFT, հաշվեհամար), ինչպես նաև անհրաժեշտ լրացուցիչ տեղեկատվություն:

«Հայապահպանության գործում ունեցած նշանակալի ավանդի համար» համահայկական ամենամյա մրցանակաբաշխության 2011թ. հայտարարությունը, հայտադիմումները, հետագայում` մրցութային հանձնաժողովների աշխատանքների, մրցույթների արդյունքների մասին տեղեկատվությունը ՀՀ սփյուռքի նախարարության և Համաշխարհային հայկական կոնգրեսի կայքէջերում` www.mindiaspora.am, www.armcongress.am, նախարարության «Հայերն այսօր» էլեկտրոնային թերթում:



Համահայկական ծրագրերի վարչություն
+374-10-585601(03)-117,
allarmenian@mindiaspora.am