«ՀՀ քաղաքացի Րաֆֆի Հովհաննիսյանի` հացադուլ իրականացնելու ընթացքում մեկ վրան կամ մեկ հովանոց տեղադրելու արգելքը գնահատում եմ որպես մարդու իրավունքների խախտում, իսկ ՀՀ ոստիկանության գործողությունները համարում եմ ոչ իրավաչափ: Հայտարարում եմ, որ անձի կողմից մեկ վրանի տեղադրումը որպես ոչ զանգվածային հրապարակային միջոցառմանը ուղեկցող գործողություն` ինքնին չի կարող որակվել որպես հասարակական կարգի խախտում», - ասված է նորանշանակ օմբուդսմենի` երկուշաբթի օրը տարածած հայտարարությունում:

Երկուշաբթի ավելի վաղ «Ազատություն» ռադիոկայանի հետ հարցազրույցում «Ժառանգության» առաջնորդը նշել էր, թե այսօր նկատելի է, որ Հայ ազգային կոնգրեսի պահանջների և ձևակերպումների մեջ էական փոփոխություններ են տեղի ունեցել:

«Եղել է չափավորում, եղել է մեղմացում, եղել է մեկնում անցյալում ամբողջական պահանջատիրությունից, և սա կարելի է միգուցե բացատրել նաև ուղղակի թե միջնորդավորված կապերով հաղորդակցությամբ, և նաև միգուցե մարտավարության փոփոխմամբ` առ այն, որ ժամանակին ասվում էր` արտակարգ ընտրություններ գործող նախագահի հրաժարականից հետո, ուրիշներին դատաքննում էին այդ դրվագով, իսկ հիմա արդեն չկա այդ հրաժարականը», - նշեց Ազատության հրապարակում հացադուլ անցկացնող գործիչը:

Արձագանքելով իր հասցեին հնչող քննադատությանը, թե հացադուլ հայտարարելով` իշխանություններին ուղղված կոնկրետ պահանջ չի ներկայացնում, Րաֆֆի Հովհաննիսյանը հայտարարեց, որ ինչպես «Ժառանգություն»-ը, այնպես էլ ինքը ասում են` այսօր անհրաժեշտ է իշխանության ամբողջական և արտահերթ փոփոխություն: Նրա խոսքերով` եթե սրանից ավելի քաղաքական պահանջ որևէ այլ գործիչ կարող է արտահայտել, ինքը ուրախ կլինի լսել նրա տեսակետը:

Ինչ վերաբերում է այն պնդմանը, թե ինչու կոնկրետ չի պահանջում Սերժ Սարգսյանի հրաժարականը, Րաֆֆի Հովհաննիսյանը նկատեց, որ վերջին շրջանում Հայ ազգային կոնգրեսի ղեկավար Լևոն Տեր-Պետրոսյանը նույնպես նման պահանջ չի դնում, մինչդեռ ժամանակին Կոնգրեսը քննադատում էր ընդդիմադիր այն ուժերին, որոնք չէին հայտարարում նախագահի հրաժարականի իրենց պահանջի մասին:

«Ժամանակին մեր ընդդիմադիր գործընկերները իրենց գործընկերներին դատում էին այն բանով, որ իրենք պահանջո՞ւմ են հրաժարական, թե՞ չէ: Ես կարծում եմ, որ «Ժառանգություն»-ը և ես` նաև այս համեստ քաղաքացիական ինքնազրկանքի ծոմով, ասում ենք, որ անհրաժեշտ է իշխանության ամբողջական և արտահերթ փոփոխություն և նորովի ձևավորում: Իսկ եթե դրա կողքը ուզում եք նաև դնել` համեմատելու համար, այլ ուժերի, այդ թվում նաև ՀԱԿ-ի (Հայ ազգային կոնգրեսի) վերջին պահանջները, հատկապես վերջին հանրահավաքի պահանջները, կարող ենք ասել, որ եթե պիտի չափենք ՀԱԿ-ի հին չափանիշով, թե ով չի պահանջում հրաժարական` ընդդիմություն չէ, արդեն դրանից կարելի է բխեցնել, որ ՀԱԿ-ը ընդդիմություն չէ», - ասաց «Ժառանգություն» կուսակցության առաջնորդը` միաժամանակ հավելելով. - «Ես տակավին նման կարծիք չունեմ»:

Անդրադառնալով երեկ Ազատության հրապարակում ոստիկանների եւ «Ժառանգություն» խմբակցության պատգամավորների միջև տեղի ունեցած միջադեպին` Հովհաննիսյանն ասաց, թե անգամ «ամենամանր խնդիրները որոշվում են Սերժ Սարգսյանի
նստավայրում»:

«Ազատության հրապարակի այդ օրվա (մարտի 17-ի) ապաշրջափակումը նույնպես նախահագահական որոշում էր, և դա նաև համաձայնեցված էր ՀԱԿ-ի ղեկավարի հետ», - պնդեց նա:

Մարտի 17-ի հանրահավաքի մասին խոսելով` Հովհաննիսյանը ասաց, թե այդ օրը «վճռորոշ» կարող էր լինել հայ ժողովրդի ապագայի, ազատության համար, բայց «շատ հարցեր մնացին անորոշ»:

Րաֆֆի Հովհաննիսյանը նշեց, որ ինքը պատրաստ էր ելույթ ունենալ Ազատության հրապարակում, բայց, քանի որ հանրահավաքը հայտարարվել էր որպես ՀԱԿ-ի և ոչ թե համազգային հանրահավաք, էթիկան պահանջում էր, որ ինքը սպասեր հրավերի, բայց «նման հրավեր չեղավ»:

Մարտի 17-ի հանրահավաքում, հիշեցնենք, Րաֆֆի Հովհաննիսյանը ոչ միայն ելույթ ունենալու հնարավորություն չունեցավ, այլև ՀԱԿ-ի առաջնորդ Լևոն Տեր-Պետրոսյանը չողջունեց իրեն:

«Ազատություն» ռադիոկայանի «Տեսակետների խաչմերում» հաղորդաշարի հերթական թողարկման ընթացքում ՀԱԿ-ի անդամ Հովհաննես Հովհաննիսյանը այս կապակցությամբ հակադարձել էր, թե ինչո՞ւ էր «Ժառանգության» առաջնորդը հացադուլի նստել` առանց Կոնգրեսի հետ համաձայնեցնելու:

Արձագանքելով այս հայտարարությանը` Հովհաննիսյանը ասաց. - «Ես կարիք չունեմ` որպես քաղաքացի, որևէ մեկի հետ համաձայնեցնեմ իմ քայլերը»:



Աղբյուրը` azatutyun.am