Լիբիայի հարցով կոնտակտային խմբի համաժողովին մասնակցելու համար Ստամբուլում գտնվող ԱՄՆ պետքարտուղար Հիլարի Քլինթոնը հանդիպել է Թուրքիայի ընդդիմադիր «Ժողովրդա-հանրապետական» և քրդական «Խաղաղություն և ժողովրդավարություն» կուսակցության ղեկավարների հետ:
Թուրքական Hurriyet-ի փոխանցմամբ` «Ժողովրդա-հանրապետական» կուսակցության անդամներին ամենաշատը զարմացրել է Քլինթոնի այն հարցը, թե ինչո՞ւ են ընդդիմադիրները դեմ հանդես գալիս ստորագրված հայ-թուրքական արձանագրություններին: «Իշխանություններն ինձ ասում են, որ ստորագրված հայ-թուրքական արձանագրությունները չեն մտցնում խորհրդարան, քանի որ «Ժողովրդա-հանրապետական»-ը դեմ է»,-ասել է Քլինթոնը:
«Ժողովրդա-հանրապետական» կուսակցության նախագահ Քեմալ Քըլըչդարօղլուն զարմանք է հայտնել այս փաստի կապակցությամբ` նշելով, թե իշխանությունը խորհրդարանում մեծամասնություն է կազմում և ցանկացած ժամանակ միայնակ կարող է անցկացնել այն: Քըլըչդարօղլուն շեշտել է, թե իշխանություններն իրենց որևէ տեղեկություն չեն տվել արձանագրությունների և Ղարաբաղի խնդրի հետ կապված եւ իրենք ստիպված մամուլով են հետեւում զարգացումներին:
Նշենք, որ Լիբիայի հարցով կոնտակտային խմբի համաժողովին մասնակցելու համար Ստամբուլ են ժամանել տարբեր երկրների մոտ 3 տասնյակ ղեկավարներ և բարձրաստիճան պաշտոնյաներ։
ԱՄՆ պետքարտուղար Հիլարի Քլինթոնի օրակարգում է նաև հայ-թուրքական հարաբերությունների և Ղարաբաղի խնդիրը։
news.am
0 Response to 'Հայ-թուրքական հարաբերությունների հետ կապված Քլինթոնի հարցը խիստ զարմացրել է թուրք ընդդիմադիրներին'
Publicar un comentario