Դա է վկայում news.am-ի հետաքննությունը մարմնավաճառների շրջանում: Այս օրերին գերծանրաբեռնված են աշխատում մարմնավաճառների գրեթե բոլոր «դասակարգերը»` էլիտար, միջին և էժանագին: Պարզվում է` մարմնավաճառության բնագավառում ևս գործում է «զեղչ» հասկացությունը, որը գործում է որոշակի իրավիճակներում: Մեզ հայտնի դարձավ, որ պարսիկներից շատերը բնակարան են վարձակալում, որոնցում բնակվում են մի քանի հոգով: Նրանք, որպես կանոն վարձակալում են մեկ մարմնավաճառ և հերթով օգտվում նրա մատուցած ծառայություններից: Հենց նման կոնտինգենտի հետ աշխատող մարմնավաճառներն էլ, սովորաբար զեղչեր են անում, քանի որ շուկայի օրենքն է` «շատով առնելու դեպքում ապրանքի գինն ընկնում է»:

news.am-ը զրուցել է նաև մայրաքաղաքի տարբեր հատվածներում «կանգնող» մարմնավաճառներից մի քանիսի հետ և ուշագրավ բացահայտումներ արել:

25-ամյա Նատալին (նրա և մյուս մարմնավաճառների անունները փոխված են), խոսելով պարսիկ «կլիենտների» հետ ունեցած շփումների մասին, ասաց, որ պարսիկներին սպասարկում է ոչ միայն Նովրուզի տոնի օրերին, այլ` տարին բոլոր, քանի որ Հայաստանում մշտական բնակություն հաստատած շատ պարսիկներ կան: «Նրանց սպասարկելը ավելի ա ձեռ տալիս, քանի որ իրանք հազար անգամ մերոնցից մակարդակով են: Իրանք գնահատում են մաքրությունը, չեն քցում, մերոնց պես լկտի չեն»,-նշեց նա:

Մեկ այլ մարմնավաճառ` 23-ամյա Մայան, որն այս օրերին Երևան է եկել Գյումրիից և բնակարան է վարձակալել Երևանում, ևս գոհ էր պարսիկ հաճախորդներին սպասարկելուց: «Բայց մի բայց կա` իրանք շատ քցիբ են, աղա չեն, կարող ա հազար դրամի համար բազար անեն»,- ասաց Մայան, հավելելով, որ տեղի «կլիենտների» համար գործում է մեկ գին, իսկ արտասահմացիների, մանավորապես`արաբների և պարսիկների համար՝ մեկ այլ գին: Ըստ նրա գնացուցակի` տեղացիների հետ սեռական հարաբերության մեջ մտնելը սկսում է 20 հազար դրամից, իսկ պարսիկների հետ մի քիչ թանկ է`սկսվում է 100 դոլարից: «Օրինակ երեկ ես մի քանի ժամվա մեջ 300 դոլար եմ աշխատել, սպասարկել եմ երկու հաճախորդի»,-հպարտացավ news.am-ի զրուցակիցը:

Մեր հարցումները պարզեցին նաև, որ այս օրերին մարմնավաճառությամբ են սկսել զբաղվել նաև ստրիպտիզ ակումբներում աշխատող պարուհիները: Նրանցից մեկը` 23-ամյա Կառան, նշեց, որ արդեն մի ամիս է` ինչ ոչ մի գրոշ չի աշխատել, սակայն հույս ունի, որ Նովրուզ-Բայրամը կօգնի բարվոք դարձնել իր սոցիալական վիճակը, կամ`ինչպես ինքն ասաց`«փող շինել»:

Մեկ այլ պարուհի` 22-ամյա Նինան, նույնպես նշեց, որ իր համար կապ չունի, թե ում է սպասարկում, կարևորը` «փողի մեջ չխաբեն, ու պահանջեն էն, ինչի դիմաց վճարել են»: «Մարդը մարդ ա»,-նշեց նա:

Հ.Գ. Մարմնավաճառները նոր պրակտիկա են մշակել` ապահովելու իրենց անվտանգությունը. «կանչի» վայր են մեկնում ոչ թե հաճախորդի մեքենայով, այլ` տաքսիով, որի մեջ էլ անցկացնում են աշխատանքից դուրս ժամերը: «Նստում ենք ավտոյի մեջ, կլիենտները գիտեն, որ մեքենայի մեջ ենք, գալիս են. բազար ենք անում, մեր մեքենայով էլ գնում ենք ուր որ պետք ա»,-նշեց 25 ամյա Անյուտան, ով 3 երեխաների մայր է և 9 տարի զբաղվում է իր փեշակով: Զրույցի պահին, ի դեպ, նրան մոտեցան հազիվ 18 տարեկան երկու երիտասարդ և «տարան»: «Դե լավ, ես գնացի գործի»,-զրույցն ընդհատելով իրենից գոհ հեռացավ Անյուտան:

Ի դեպ, մարմնավաճառներին մեր այցելության ժամանակ, ուշագրավ տեսարանի ականատես եղանք. 60-ն անց մի կին մարմնավաճառներից մեկից թախանձագին ինչ-որ բան էր խնդրում, սակայն նա արհամարհական տոնով մերժում էր կնոջը: Պարզվեց կինը աղջկա տատն էր, իսկ թե ինչ էր խնդրում` չհաջողվեց պարզել:

Քիչ անց մեզ հետ զրույցում աղջիկը «երդում կերավ», (հավանաբար տատին լսեցնելու համար), որ «գործ չի անում», իր գործի անունը գործընկերներին «ոսկեղեն ու դուխի» վաճառելն է: Տեսնելով, որ թոռը հարցազրույց է տալիս լրագրողի, տատը աննկատ նստեց այն տաքսին, որի մեջ կային մի քանի մարմնավաճառներ եւ լուռ հետևում էր զրույցին: Ոսկեղենի և օծանելիքի վաճառքով զբաղվող աղջիկը, պարզեցինք, ևս մարմնավաճառությամբ է զբաղվում, Երևան է եկել Աշտարակից: Ի դեպ, նա էր փողոցով անցուդարձ անող իր կոլեգաներին բարեխոսում, որ «մի երկու բան խոսան»: Զգացվում էր, որ նրա խոսքը քաշ ունի:

Տեղանքի բենզալացակայանի աշխատակիցներից մեկն էլ որոշեց իր դարդերը կիսել և աջակցություն խնդրեց: «Մի բան արեք, սրանց ստեղից մաքրել տվեք, էլի: Ամոթները կորցրած`ցերեկներն էլ են գալիս կանգնում»:


Աղբյուրը` Լուրեր.net