Թուրքական լրատվամիջոցի փոխանցմամբ՝ Սենատի հանձնաժողովն իր որոշումը հիմնավորել է հետևյալ կերպ. «Հարկավոր չէ, որ օրենսդիր մարմինը պատմություն գրի։ Օրինագիծը հակասում է Ֆրանսիայի Սահմանադրությանն ու խոսքի ազատությանը»։
Սենատի հանձնաժողովի որոշման մեջ նշվում է նաև, որ Հայոց ցեղասպանության փաստի ժխտումը քրեականացնող օրինագծի ընդունումը բացասաբար է ազդելու թուրք–ֆրանսիական հարաբերությունների վրա։
«Եվ հաշվի առնելով այն հանգամանքը, որ 2011թ. տեղի են ունենալու Սենատի ընտրությունները, ապա օրինագծի հնարավոր քննարկումը կհետաձգվի մինչև 2012թ.՝ նախագահական և Ազգային ժողովի ընտրություններից հետո»,– նշում է թուրքական լրատվամիջոցը։
Հիշեցնենք, որ օրեր առաջ Թուրքիայի Ազգային մեծ ժողովի նախագահ Մեհմեդ Ալի Շահինը, արտգործնախարար Ահմեթ Դավութօղլուն, թուրք–ֆրանսիական բարեկամության խմբի նախագահ Յաշար Յաքըշը և Ժողովրդա–հանրապետական ընդդիմադիր կուսակցության առաջնորդ Քեմալ Քըլըչդարօղլուն նամակներ էին ուղղել իրենց ֆրանսիացի գործընկերներին, որոնցում մասնավորապես ասվում էր. «Օրինագծի ընդունումն անդառնալի վնասներ է պատճառելու թուրք–ֆրանսիական հարաբերություններին։ Բացի այդ, ներկայացված օրինագիծը հակասում է խոսքի ազատությանը»։
Ինչպես ավելի վաղ տեղեկացրել էինք, Սոցիալիստական ընդդիմադիր կուսակցությունը պատրաստվում է մայիսի 4-ին Ֆրանսիայի Սենատի օրակարգ բերել Հայոց ցեղասպանության փաստի ժխտումը քրեականացնող օրինագիծը։
Օրինագիծը 2006թ. ընդունվել է Ֆրանսիայի Ազգային ժողովի (ստորին պալատ) կողմից և մինչև օրս չի վավերացվել Սենատում: 2010թ. մայիսի 19-ին նման օրինագիծ էր ներկայացվել Կոմունիստական կուսակցության անդամ, Սենատի փոխխոսնակ Գայ Ֆիշերի կողմից: Իսկ 2010թ. հուլիսի 5-ին 30 սոցիալիստ սենատորներ ներկայացրեցին համանման ևս մեկ օրինագիծ: Այդպիսով, ֆրանսիական Սենատում Հայոց ցեղասպանության փաստի ժխտումը քրեականացնող օրինագծերը երեքն են, և շատ հնարավոր է, որ ֆրանսիացի սենատորները 2011թ. խորհրդարանական ընտրություններին ընդառաջ քննարկեն այդ օրինագծերը։
Եթե օրինագիծն արժանանա ֆրանսիական Սենատի հավանությանը և ստորագրվի երկրի նախագահի կողմից, ապա Ֆրանսիայի տարածքում բոլոր նրանք, ովքեր կպնդեն, թե Հայոց ցեղասպանություն չի եղել, կդատապարտվեն 5 տարվա ազատազրկման և կտուգանվեն 45 հազար եվրոյով:
Թերթ.am
0 Response to 'Ֆրանսիական Սենատի հանձնաժողովը «ոչ» է ասել Հայոց ցեղասպանության փաստի ժխտումը քրեականացնող օրինագծին. թուրքական ԶԼՄ–ներ'
Publicar un comentario