Մեր «հետաքննությունն» սկսեցինք տարածքի տարեց առևտրականներից, ինչին ի պատասխան նրանք ասացին. «Դուք չե՞ք տեսնում, հիմա ամեն ինչ էլ կա, ամեն ինչ էլ տեսնում ենք: Դուք այս երկրից եք և պետք է որ լավ իմանաք այդ մասին: Բնական է, սաղս էլ լսում ենք խոսակցություններ, բայց ոչինչ չեմ կարող ասել, քանի որ աչքովս դեռ չեմ տեսել: Իրենք տեր ունեն ու այդքան միամիտ չեն, որ բացահայտ գործեն: Մենք էլ այնքան միամիտ չենք, որ այդ մասին բարձրաձայնենք, քանի որ նրանք իրենց գլխին լուրջ տեր ունեն»։ Մեր զրուցակիցը չցանկացավ ներկայանալ և սահմանափակվեց այսքանով: Նկատենք, որ տարածքի աշխատակիցները գրեթե նույն բանն էին ասում տարբեր ձևակերպումներով: Այսինքն` չէին հերքում, բայց նաև չէին բացում փակագծերը:

Մեզ, սակայն, հաջողվեց ճշտել, որ Գրիգոր Լուսավորիչ եկեղեցու տարածքում տվյալ խմբի մասնակիցները ընդամենը սահմանափակվում են ծանոթությամբ և ծառայության արժեքը համաձայնեցնելով: Համաձայնության գալուց հետո հրավիրում են ծանոթ տաքսի և առանձին-առանձին գնում այն վայրը, որտեղ հաճախորդին պետք է համապատասխան ծառայությունը մատուցվի: Ծառայության ինքնարժեքը, սակայն, շատ ցածր է` մոտավորապես 1000 դրամ, որից ավելին արդեն կախված է հաճախորդի առատաձեռնությունից: Ի դեպ, տաքսիների և օբյեկտի գումարի ծախսերը ևս հոգում է հաճախորդը: Տեղեկացնենք նաև, որ տվյալ տարածքի տղաների ծառայությունից հիմնականում օգտվում են տղամարդիկ, սակայն նրանք կանանց համար էլ են ծառայություն մատուցում: Այդ երեխաների և տղամարդկանց ծառայությունից, ըստ խոսակցությունների, հիմնականում օգտվում են տարեց կանայք` թոշակառուները: Հարց, իսկ որտեղի՞ց են հաճախորդները տեղեկանում այդ վայրի և ծառայության մասին, եթե ցերեկային ժամերին ոչ մի ՙազդանշան՚ չկա: Այս հարցի պատասխանը ևս ստացանք:

Պարզվում է` այդ վայրը ինչպես հարկն է գովազդվում է «Ֆայլաբազարում»: Այսինքն` այնտեղի տարեց տղամարդ մարմնավաճառները, ըստ պարագլուխների հետ ունեցած նախնական համաձայնության, իրենց հաճախորդների այն հատվածին, որոնց չեն կարողանում սպասարկել` ուղղորդում են այնտեղ: Իսկ ինչպե՞ս են այդ տղաները հայտնվում նման ցանցում: Պարզվում է` նրանք հիմնականում անօթևան և հատուկ դպրոցի երեխաներն են, որոնց կամ գտել են միջնորդավորված, կամ էլ մուրացկանության ընթացքում որոշ մարդիկ հարկադրել են մուրացկանությամբ զբաղվելու փոխարեն, զբաղվել այդ գործով: Իսկ այն երեխաները, որոնք ընդդիմացել են, ենթարկվել են բռնաբարության, ինչի մասին աղմուկ չբարձրացնելու դիմաց` նրանց ստիպել են անցնել մարմնավաճառության: Սկզբում նրանց ոգևորելու համար գումարներ են տվել, սակայն հետագայում դրանից էլ են զրկել: Իսկ ներկա պահին այդ երեխաներն իրենց այնքան նվաստացած ու ստորացված են զգում, որ նույնիսկ հնարավորության դեպքում չեն համարձակվի դուրս գալ այդ ցանցից` հասարակության առաջ ամոթահար լինելուց զերծ մնալու համար: Նշենք, որ տղաների շրջանում այսպիսիներին օգտագործվածներ կամ աքլորներ` ՙպիտուխներ՚ են անվանում:

Մենք մոտեցանք նաև տվյալ տարածքում վերահսկողություն իրականացնող ոստիկաններին` հետաքրքրվելու համար, թե հիմնավո՞ր են այդ կասկածները, սակայն նրանք պատասխանեցին, որ առաջին անգամ մեզանից են այդ մասին լսում: Ահազանգն իհարկե մեզ ևս կասկածելի կթվար, եթե մեր բարձրացրած հարցը «Լունապարկի» և ընդհանրապես ամբողջ այգու տարածքում իրարանցում չառաջացներ: Րոպեներ անց մենք հայտնվեցինք մի խումբ երիտասարդների վերահսկողության տակ, որոնք տարբեր կողմից մեզ հետևում էին` փաստորեն ՙուղեկցելով՚ մինչև աշխատավայր: Իսկ երբ նրանցից ոմանց տարբեր վայրերում հարցնում էինք` ի՞նչ խնդիր կա, պատասխանում էին, թե ցանկանում են ծանոթանալ: Իսկ վերջում մեկը, հավանաբար, իրենց հանդեպ կասկածը վերացնելու համար նշեց, թե մեզ անհանգստացնող տղաները քաղաքացիական հագուստով ոստիկաններ են:

Ինչևէ, քանի որ տարածքը գտնվում է քաղաքապետարանի ենթակայության տակ, Կարեն Կարապետյանի մամլո քարտուղար Շուշան Սարդարյանից հետաքրքրվեցինք, թե քայլեր ձեռնարկելո՞ւ են այս կասկածներն ուսումնասիրելու և կանխարգելելու ուղղությամբ, ինչին ի պատասխան նշեց, որ այդ մասին պաշտոնապես ահազանգ չեն ստացել, բայց լրատվամիջոցներից ծանոթ է մտահոգությանը: Նրա խոսքերով, քաղաքապետարանն իրականացնում է այգու բարեկարգման, կանաչապատման աշխատանքները, հետևաբար նման խնդիրներով պետք է դիմել իրավապահ մարմիններին և հ/կ-ներին:

Ոստիկանության քրեական հետախուզության գլխավոր վարչության երրորդ վարչության պետի տեղակալ Նելլի Դուրյանը մեզ հետ զրույցում ընդգծեց , որ նման ահազանգ չեն ստացել, բայց խոստացավ հետամուտ լինել: Ոստիկանության լրատվության վարչության պետ Աշոտ Ահարոնյանը ևս խոստացավ հետամուտ լինել և վերահսկողությունը ուժեղացնել տվյալ տարածքում: ՙՍեռական շահագործումը լուրջ մեղադրանք է, պետք է ուսումնասիրենք՚,- ավելացրեց Աշոտ Ահարոնյանը: Սակայն պետք է խոստովանենք, որ նույնիսկ լուրջ փաստերի առկայության դեպքում այս կասկածները փաստերով ջրի երես դուրս չեն գա, եթե մեծ, ընդհուպ մինչև քաղաքական կամք չլինի, քանի որ նման գործերի հետևում պատահական մարդիկ չեն կանգնած: Հակառակ դեպքում հեքիաթ հիշեցնող այդ տարածքը գիշերային ժամերին վերածվում է անառակության որջի, այն էլ` եկեղեցու հարևանությամբ:

Հ.Գ. Մենք մեր հերթին այս խնդիրը կպահենք ուշադրության կենտրոնում և նոր մանրամասների բացահայտման դեպքում հավելյալ կտեղեկացնենք:
/Տաթև Մեսրոպյան/


in.am