Շարժման անդամ Տիգրան Խզմալյանը հայտարարեց, որ Ճարտարապետների միության ղեկավարության հետ դահլիճը վարձակալելու պայմանավորվածությունը ձեռք է բերվել շաբաթներ առաջ, անգամ վճարվել է վարձակալության գումարը, սակայն վերջին պահին իրենց տեղյակ են պահել, որ չեն կարող դահլիճը տրամադրել:
«Մի քանի ժամ առաջ մեզ ասացին, որ դժվար բացատրելի պատճառներով չեն կարող դահլիճը տրամադրել: Անգամ չկարողացան պատճառաբանել։ Պարզ է, որ մարդկանց ստիպել են: Մենք դա համարեցինք արտառոց դեպք և այդ պատճառով հանդիպումից առաջ հրավիրեցինք այս ասուլիսը»,- ասաց Խզմալյանը: Նա տեղեկացրեց, որ իրենք երիտասարդների հետ հանդիպումը կանցկացնեն «Կենաց տուն» մշակութային տանը:
«Նկատենք, որ սա կատարվել է Ստրասբուրգի հայտնի հայտարարություններից հետո և կազանյան հանդիպումից մեկ օր առաջ: Մի երկրում, մի մայրաքաղաքում, որտեղ տարբեր դահլիճներ հեշտորեն տրամադրվում են տարբեր աղանդների կամ հայտնի միջազգային կասկածելի կազմակերպություններ իրենց հանդիպումները հայտարարում են կառավարության շենքից մի քանի մետր հեռավորության վրա, «Սարդարապատ» շարժման հանդիպումը երիտասարդների հետ համարվում է անցանկալի և արգելվում է այն շրջանակների կողմից, ովքեր մեր երկրում իրավասու են արգելելու այս տասնօրյակների ընթացքում»,- հայտարարեց Տիգրան Խզմալյանը:
Շարժման անդամ Հայկ Բալանյանն էլ հայտարարեց, թե վերջին ամիսներին «Հայաստանում կատարվողը թատերական ներկայացում է, և վարչակարգի էությունը չի փոխվել»: Նա կապ գտավ Հայաստանի, Ադրբեջանի և Ռուսաստանի նախագահների հունիսի 24-ին նախատեսված կազանյան հանդիպման և իրենց դահլիճ չտրամադրելու միջև և հայտարարեց, թե իրենք չեն ընդունելու և չեն ճանաչելու Կազանում ստորագրված որևէ փաստաթուղթ:
«Սարդարապատ» շարժման անդամ Գարեգին Չուքազսյանն էլ տարօրինակ համարեց, թե ինչու իրենց դահլիճ չեն տրամադրել՝ նշելով, որ շարժման անդամները վերջին շրջանում բազմաթիվ ասուլիսներ են տվել ու քննարկումներ կազմակերպել, հետևաբար «որևէ նորություն պիտի որ չլիներ»:
«Հավանաբար, իրենք լուրջ պատճառներ ունեին արգելելու այսօրվա հանդիպումը: Մենք այս ամենը դիտարկում ենք ազգային անվտանգության և ժողովրդավարության արժեքների ոտնահարում, միաժամանակ կարծում ենք, որ ազգային անվտանգությունն ու ժողովրդավարությունն իրար չեն հակադրվում, այլ փոխլրացնում են իրար»,- ասաց Չուքասզյանը:
Թերթ.am
0 Response to '«Սարդարապատ»-ին ճարտարապետները դահլիճ չտրամադրեցին'
Publicar un comentario