Ինչո՞ւ են մարդիկ զարմանում, որ երկրորդ «երկրի»` եվրոգոտու արժույթն ավելի ամուր է, քան առաջինինը` Միացյալ Նահանգներինը: Արդյոք պատճառը պետպարտքի վերաֆինանսավորման խնդիրներն ու տնտեսական «համաճարակի» հավանականությո՞ւնն են: Բոլոր դեպքերում` այս խնդիրները պետք է ընկած լինեն եվրոբոնդերի սփրեդներում, սակայն ոչ հենց եվրոյի փոխարժեքում:

ԱՄՆ-ի Դաշնային պահուստային համակարգի ղեկավար Բեն Բեռնանկեն կարծում է, որ թույլ դոլարը դեղամիջոց է ամերիկյան տնտեսության ներկայիս խնդիրների համար: Շատերը մոռանում են, որ այս գործողությունը եվրոգոտուց բացի այլ մասնակից չի կարող ունենալ, որտեղ արժույթի փոխարժեքը բարձր է` չնայած մի շարք խնդիրների:

Մեկ տարի առաջ եվրոն, ըստ էության, միակ ակտիվն էր, որով կատարվող առևտուրն ընկալվում էր որպես պաշտպանության միջոց եվրոգոտու բոլոր խնդիրներից: Շարժիչ ուժը մասամբ իրացվելիությունն էր. եվրոն վաճառելն ավելի հեշտ է, քան եվրոգոտու «արվարձանային» երկրների պարտատոմսերի կարճաժամկետ վաճառքն է: Երբ եվրոն հասավ իր նվազագույն մակարդակին, անվտանգությունը նվազեց, և թրեյդերներն անմիջապես հետ քաշվեցին: Արդյունքում այժմ եվրոն զգալիորեն ամրապնդվել է, մինչդեռ «արվարձանային» երկրների պարտատոմսերի եկամտաբերությունը զգալիորեն նվազել է:

Պարտատոմսերի շուկայի հետ ընթացիկ երկխոսությունը քաղաքական գործիչներին դրդում է իրական բարեփոխումների: Հունաստանի շահերից է բխում պարտքի վերակառուցման երկարաձգումը մինչև նոր բարեփոխումների իրականացում: Պորտուգալիայի գլխավոր խնդիրը թույլ կառավարությամբ փոքր երկիր լինելն է, սակայն իր պարտավորությունները նա ի վիճակի է կատարել: Իսպանիայում պղպջակը պայթեց անշարժ գույքի շուկայում, որն այնքան էլ սարսափելի չէ. նա ունի իրական տնտեսություն և մեծ ռեսուրսներ: Իռլանդիայի դրությունն ավելի բարդ է. այնտեղ դեֆոլտը, ամենայն հավանականությամբ, ձեռնտու տարբերակ է քաղաքական գործիչների համար: Սակայն մեզ ավելի շատ անհանգստացնում է այս ամենը ոչ թե եվրոյի, այլ ֆունտ ստեռլինգի հետագա ճակատագրի համար` նկատի ունենալով բրիտանական բանկային համակարգի հետ ունեցած կապերը:

ԱՄՆ-ում սպառողներն ամբողջովին թաղված են պարտքերի մեջ, և հնարավոր է` չկարողանան դիմակայել տոկոսադրույքների բարձրացմանը: ԱՄՆ-ում ընթացիկ հաշվեկշռի մեծ պակասուրդի հետևանքով դոլարը պարտատոմսերի շուկայի ցնցումների նկատմամբ ավելի խոցելի է, քան եվրոն:

Կարճաժամկետ հեռանկարում մեզ ավելի շատ հուզում են ամերիկյան դոլարի ռիսկերը, քան հունական դրամայի պատճառով եվրոյի գլխին կախված սպառնալիքները:




«Կապիտալ» օրաթերթ