Ինչպես նշեց եռամյա (2009-2012 թթ.) «Միավորվենք հանուն երեխաների, փրկենք ապագան» ծրագիրն իրականացնող «Սեյվ դը չիլդրենի» հայաստանյան գրասենյակի տնօրեն Իրինա Սաղոյանը չորեքշաբթի ծրագրի տարեկան հաշվետվության ժամանակ, երեխաների նկատմամբ բռնություններ կիրառվում են աշխարհի բոլոր երկրներում, և Հայաստանն այդ առումով բացառություն չէ:
Ծրագրի ղեկավար Աննա Հարությունյանը նշում է, որ տանը ֆիզիկական բռնություն իրականացվում է, երբ ծնողներն ալկոհոլից կամ թմրանյութերից կախվածություն ունեն կամ էլ սոցիալական ծանր պայմաններից առաջացած սթրեսի պատճառով: Սակայն, ինչպես նշում է Հարությունյանը, երեխային ֆիզիկական բռնության ենթարկելու պատճառներից մեկն էլ ծնողավարման հմտությունների պակասն ու անիրազեկությունն է:
«Շատերը չգիտեն, որ ապտակը նույնպես բռնություն է»,- նշեց Հարությունյանը:
Ըստ նրա՝ մարզերում երեխաները ենթարկվում են նաև աշխատանքային բռնության, երբ գյուղատնտեսական սեզոնային աշխատանքների ժամանակ դպրոց չեն գնում և օգնում են ծնողներին:
«Այս դեպքում խախտվում է նրանց կրթության իրավունքը»,- ասաց Հարությունյանը՝ հավելելով, որ երեխաները շատ հաճախ չեն ընկալվում որպես հասարակության լիարժեք անդամ, նրանց կարծիքը հաշվի չի առնվում (հոգեբանական բռնության տեսակ):
Ծրագրի շրջանակներում մշակվել է ձեռնարկ, որտեղ ներկայացվում են երեխայի պաշտպանության աստիճանները, ինչպես ճանաչել բռնությունը և բացառել այն: Հայաստանի 25 քաղաքներում 350 մարդ արդեն վերապատրաստվել է այս ձեռնարկով: Ծնողավարման հմտությունների վերաբերյալ դասընթացների կմասնակցեն նաև ծնողները:
Մասնագետները կարծում են, որ խնդիրը նաև օրենսդրական փոփոխությունների կարիք ունի: Աշխատանքի և սոցիալական հարցերի նախարարության ընտանիքի, կանանց և երեխաների հիմնահարցերի վարչության պետ Լալա Ղազարյանն ընդունում է, որ բռնությունը որպես այսպիսին «հին երևույթ է, սակայն որպես խնդիր նախարարությունը դրանով սկսել է զբաղվել վերջին երեք տարիների ընթացքում»: Նա նշում է, որ այժմ աշխատում են օրենսդրության վերանայման վրա, որը պատրաստ կլինի տարեվերջին: Ղազարյանի խոսքով՝ փորձ է արվում երեխաների պաշտպանության վերաբերյալ օրենսդրությունը համապատասխանեցնել միջազգային օրենսդրական նորմերին, քանի որ «Հայաստանը վաղուց է վավերացրել ՄԱԿ-ի «Երեխայի իրավունքների մասին» կոնվենցիան»:
Հայաստանում Եվրամիության պատվիրակության ղեկավար Ռաուլ դե Լուցենբերգերն ասում է, որ երեխաների պաշտպանությանն ուղղված ծրագրերը միշտ Եվրամիության ուշադրության կենտրոնում են, և իրենք շարունակելու են նման ծրագրերի ֆինանսավորումը։
armenianow
0 Response to '«Փրկենք ապագան». ՀԿ-ն ներկայացնում է երեխաների նկատմամբ բռնության դեպքերը հայտնաբերելու մասին ծրագրի հաշվետվությունը'
Publicar un comentario