Վան այցելած հայ և թուրք լրագրողների խմբի մեջ ընդգրկված NEWS.am-ի թղթակցին ևս «գանձ որոնողները» տարբեր առաջարկություններ արեցին: Վանում նրանց մեծ մասն առաջարկում էր ասել դրանց տեղը՝ խոստանալով գտնվածի կեսը: Իսկ ամենազավեշտալի առաջարկն արեց Վանի սննդամթերքի փոքրիկ խանութի տեր Ալին, ով իմանալով, որ իր հետ զրուցող NEWS.am-ի թղթակիցը հայ է, սկսեց գովել հայերին, քննադատել երիտթուրքերին, ովքեր կազմակերպեցին հայերի կոտորածը: Այն հարցին, թե Ալին հա՞յ է, վերջինս պատասխանեց. «Հայ չեմ, բայց հայերին սիրում եմ: Ցավում եմ, որ նրանց հետ նման դժբախտություն պատահեց: Բայց նրանք այս կողմերում շատ ոսկիներ են պահել, որոնք անիմաստ կորչելու են: Ինձ ասա դրանց տեղը. քեզ նույնպես բաժին կհանեմ»:

Երբ Ալին առաջարկում էր ոսկիների հետ կապված «գործարքը», խանութ մտած այցելուներից մեկը՝ Բենգին, պնդեց, թե հարամ է ուրիշի դժբախտության վրա հարստանալ, քանի որ նրանք կոտորվել են և փրկվելու համար ստիպված թողել են իրենց ունեցվածքն ու հեռացել: Նա պատմեց, որ տարիներ առաջ Վանա լճի կողքին գտնվող Արճեշի գյուղերից մեկում մի երիտասարդ վարորդ պատահաբար ոսկիներ էր հայտնաբերել, սակայն այդ գյուղի բնակիչներից մեկը զենքի սպառնալիքով խլել էր ոսկիները:

«Գտած ոսկին խլած անձնավորւթյան ընտանիքում դժբախտությունների շարանի պատճառ էր դարձել: Գյուղացին, հասկանալով, որ դժբախտության պատճառը խլած ոսկին է, գալիս է Վան, վարորդից ներողություն խնդրում եւ դրա դիմաց գումար առաջարկում: Բայց վարորդը վիրավորված էր և մերժում է այդ առաջարկը: Դրանից շատ չանցած` ոսկին խլած անձնավորության ամբողջ ընտանիքի անդամները տարբեր պատճառներով մահացան»,-պատմել է Բենգին:
Վանում NEWS.am-ի թղթակցի հետ զրույցներում միայն մեկ հոգի է պնդել, որ Վանի Բաշքալեի շրջանում տարիբեր առաջ սփյուռքահայեր են եկել և թուրքերի ուղեկցությամբ գտել մի քանի կիլոգրամի հասնող ոսկի:



hayernaysor