«Փաստերի լիակատար, շիտակ և արդարացի ճանաչումը բխում է մեր շահերից: Վիճարկվող պատմությունը ապակայունացնում է ներկան և ստվեր է գցում կյանքից զրկվածների հիշատակի վրա, մինչդեռ անցյալի հետ հաշվի նստելը ամուր հիմք է ստեղծում համատեղ խաղաղ և բարգավաճ ապագայի համար», - հայտարարել է Օբաման: - «Պատմությունը մեզ ուսուցանում է, որ մեր պետությունները ավելի հզոր են ու մեր գործը` ավելի արդար, երբ մենք պատշաճ կերպով ճանաչում ենք ցավոտ անցյալը և աշխատում ենք դեպի վաղվա ավելի լավ օրը փոխըմբռնման կամուրջները վերակառուցելու համար: Միացյալ Նահանգները այդ դասը լավ գիտի մեր իսկ պատմության մութ էջերից»:

«Ես սատարում եմ Հայաստանում եւ Թուրքիայում անհատների կողմից ձեռնարկվող խիզախ քայլերը` նպաստելու իրենց ընդհանուր պատմությունը ճանաչող երկխոսությանը», - ասել է ԱՄՆ-ի նախագահը:

«Հիշատակելով Մեծ Եղեռնը և հարգանքի տուրք մատուցելով զոհվածների հիշատակին` մենք նաև վերստին պարտավորվում ենք ապահովել, որպեսզի նման աղետալի իրադարձությունները երբեք չկրկնվեն: Դա արդի մի խնդիր է, որ հազարավոր ամերիկահայեր դարձրել են իրենց գործը: Հայ ժողովրդի ժառանգությունն է տոկունությունը, վճռականությունը և հաղթանակը նրանց նկատմամբ, ովքեր ցանկանում էին ոչնչացնել իրեն», - հայտարարել է Բարաք Օբաման:

Նա ընդգծել է, որ Միացյալ Նահանգներում մեծ ավանդ ունեն ամերիկահայերը, «որոնցից շատերը Մեծ Եղեռնից փրկվածների սերունդներն են». - «Հայկական ծագում ունեցող ամերիկացիները ուժեղացրել են մեր հասարակությունը և մեր համայնքները իրենց հարուստ մշակույթով և ավանդույթներով»:

«Այս ողբերգական պատմությանը դեմ հանդիման հայ ժողովրդի ցուցաբերած ոգին ոգեշնչում է բոլոր նրանց, ովքեր ձգտում են ավելի խաղաղ և արդար աշխարհի», - հայտարարել է Օբաման:

«Մեր սրտերը և աղոթքները հայերի հետ են ամենուր, երբ մենք հիշում ենք Մեծ Եղեռնի սարսափները, հարգում ենք տուժածների հիշատակը և մեր բարեկամությունն ու խորին հարգանքն են հավաստում առ Հայաստանի ժողովուրդը», - իր ուղերձը եզրափակել է Միացյալ Նահանգների նախագահը:

Associated Press լրատվական գործակալության փոխանցմամբ` Ամերիկայի հայկական համագումարը հայտարարել է, որ բավարարված չէ Օբամայի ուղերձով, և այն «բաց թողնված հնարավորություն» է որակել: «Բառերը իրոք կարևոր են, և Սուրբ Զատիկին ու Հայոց ցեղասպանության հիշատակի օրվան նախորդող այսօրվա հայտարարությունը անցյալի բաց վերքերը բուժելուն նպաստելու բաց թողնված հնարավորություն է», - ասել է Համագումարի գործադիր տնօրեն Բրայան Արդունին:

Ամերիկայի Հայ դատի հանձնախումբը արձանագրում է, որ «նախագահ Բարաք Օբաման կրկին դրժեց մարդկության դեմ այս հանցագործությունը պատշաճ կերպով դատապարտելու և  հիշատակելու իր խոստումը»:

«Թուրքիայի սպառնալիքների առջև նախագահ Օբամայի ամոթալի կապիտուլյացիան, նրա մեղսակցությունը Թուրքիայի ուրացումներին և Կոնգրեսի կողմից Հայոց ցեղասպանության ճանաչմանը նրա վարչակազմի ակտիվ հակազդեցությունը ճիշտ հակառակն են սկզբունքային և ազնիվ փոփոխությունների, որ նա խոստացել էր կատարել այդ ոճրագործությանը մեր երկրի արձագանքի հարցում», - հայտարարել է Ամերիկայի Հայ դատի հանձնախմբի ատենապետ Քեն Խաչիկյանը:

Ինչպես Սենատում աշխատանքի տարիներին, այնպես էլ 2008 թվականի նախագահական ընտրարշավի ժամանակ Բարաք Օբաման բազմիցս հանդես է եկել Միացյալ Նահանգների կողմից Հայոց ցեղասպանության ճանաչման օգտին և խոստացել է նախագահ ընտրվելու դեպքում ճանաչել ցեղասպանությունը:

Պաշտոնական Անկարան, իր հերթին, «խորը ափսոսանք» է հայտնել Օբամայի ուղերձի կապակցությամբ և այն որակել «միակողմանի»:

«Հայտարարությունը աղավաղում է պատմական փաստերը: Հետևաբար, մենք այն համարում ենք շատ խնդրահարույց և խորապես ափսոսում ենք այդ կապակցությամբ:  Միակողմանի հայտարարությունները խոչընդոտում են ճշմարտության ըմբռնմանը», - ասված է կիրակի օրը Թուրքիայի արտգործնախարարության հրապարակած հայտարարությունում:

«Մենք կցանկանայինք, որպեսզի մեր բարեկամ և դաշնակից Միացյալ Նահանգների նախագահը հաղորդակից լիներ նաև Թուրքիայի ցավին և ուղերձ հրապարակեր նոր տեսանկյունից», - «Անադոլու» լրատվական գործակալության փոխանցմամբ` Օբամայի ուղերձի վերաբերյալ հայտարարել է Թուրքիայի արտգործնախարար Ահմեթ Դավութօղլուն:

Ավելի վաղ` Բարաք Օբամայի ուղերձի հրապարակումից անմիջապես հետո, ԱՄՆ-ում Թուրքիայի դեսպան Նամըք Թանը այն որակել էր «պատմության ոչ ճշգրիտ, թերի և միակողմանի քաղաքական բնութագրում»:




Աղբյուրը` Ազատություն ռադիոկայան