«Ավագ շաբաթվա յուրաքանչյուր օր խորհրդանշում է Հիսուս Քրիստոսի երկրային կյանքի կարևոր իրադարձություններից մեկը: Ավագ հինգշաբթին խորհրդանշում է «Վերջին ընթրիքը» և Հուդայի կողմից Տիրոջ մատնությունը»,- ասում է Մայր Աթոռի մամլո դիվանի պատասխանատու Տեր Վահրամ քահանա Մելիքյանը:
«Ավագ հինգշաբթի եկեղեցու քահանան տասներկու մանուկների հետ բարձրանում է խորան: Աղոթքից հետո հոգևորականը վերցնում է սրբիչը, ծունկի գալիս և լվանում տասներկուսի ոտքերը և յուղով օծում: Արարողությունից հետո հավատացյալներին բաժանում ենք օրհնած յուղ»,- Տեր Վահրամ քահանա Մելիքյանը բացատրում է արարողության կարգը:
Ավագ Ուրբաթը խորհրդանշում է Տիրոջ խաչելությունն ու թաղումը: Այդ օրը կատարվում է «Խավարման» արարողությունը, որի ժամանակ խորանի վրա վառվում են 12 հավասարաչափ մոմեր և մեկ մեծ մոմ` նրանց միջև: Այդ ժամանակ ընթերցվում է Ավետարանից յոթ հատվածներ, որոնք բովանդակում են Հիսուսի` Գեթսեմանիի պարտեզում աղոթքը, Հուդայի մատնելը, Պետրոսի ուրանալը և զղջալը:
Ավագ շաբաթը խորհրդանշում է դժոխքի ավերումը: Այդ օրը նվիրված է Հիսուսի թաղմանը և գերեզմանի կնքմանը:
Շաբաթ երեկոյան կատարվում է Ճրագալույցի պատարագ: «Ճրագալույց նշանակում է ճրագը վառել: Ճրագալույցի պատարագ մատուցվում է բացառապես Ծննդյան և Հարության տոներին նախորդող օրվա երեկոյան: Զատիկի Ճրագալույցի պատարագի ժամանակ տրվում է Քրիստոսի հարության ավետիսը և ավետվում է Մեծ պահքը»,- պարզաբանում է Տեր Վահրամ քահանա Մելիքյանը:
0 Response to 'Ավագ շաբաթվա վերջին օրերի խորհուրդը'
Publicar un comentario