Ամեն տարի Քրիստոսի Սուրբ Հարության և դրան նախորդող օրերին եվրոպական որևէ երկրում համախմբվում են տասնյակ հարյուրավոր հայ երիտասարդներ` եվրոպական և Մերձավոր Արևելքի երկրներից, հայապահպանության գաղափարը մշտարթուն պահելու մեծագույն ցանկությամբ: Համաեվրոպական հայկական խաղերի կազմակերպումը ոչ միայն մարզական միջոցառում է, այլև Եվրոպայի տարբեր երկրներում բնակվող հայ երիտասարդների համախմբմանն ու հայապահպանությանը միտված բացառիկ դրսևորում:

«Եվրահայկական խաղերին» Հայաստանի Հանրապետությունից մարզիկների մասնակցությունը` օրեցօր զարգացող, կայունացող ու ամրապնդվող Հայաստան-Սփյուռք կապերի վկայությունն է:

Ժնևի հայ համայնքը ձևավորվել է 19-րդ դարի վերջին և 20-րդ դարի սկզբին: Այստեղ բնակվում է շվեյցարահայության զգալի մասը` շուրջ 1000 մարդ: Ժնևում է կենտրոնացված համայնքի ազգային կառույցների հիմնական մասը: Առաջին հայկական կազմակերպություններից է Ժնևի Հայկական միությունը, որը հիմնադրվել է 1943 թվականին: Ծնունդով լիբանանցի, այժմ շվեյցարաբնակ հայազգի Վահե Կապրաշը ավելի քան 20 տարի գլխավորել է Շվեյցարիայի հայկական միությունը: Ներկայումս Միության նախագահն է Զարե Կուրկջյանը:

Միությունը մեծ դերակատարություն ունի Սփյուռքում հայապահպանության, երիտասարդության հայեցի դաստիարակության գործում: Բազմաթիվ համայնքային միջոցառումներից բացի, միությունը կազմակերպում է նաև միջհամայնքային սպորտային տարբեր մրցաշարեր: Մրցումներ են անցկացվում մինի ֆուտբոլի, բասկետբոլի, վոլեյբոլի, սեղանի թենիսի, բադմինտոնի, շախմատի մարզաձևերից:



ՀՀ սփյուռքի նախարարության աշխատակազմի համահայկական,
միջազգային և եկեղեցական կառույցների հետ կապերի վարչություն