-Որքա՞ն ժամանակ է, որ աշխատում եք ՀՀ սփյուռքի նախարարությունում:

- 2002 թվականից 2009 թվականը աշխատել եմ Ֆրանսիայում և առաջին իսկ օրվանից շատ ակտիվ համագործակցել եմ հայ համայնքի գրեթե բոլոր կազմակերպությունների, ինչպես նաև երեք ավանդական կուսակցությունների հետ: Հիմնական գործունեությունս Մարսելում Է ծավալվել, քանի որ հենց այնտեղ Էի բնակվում: Իսկ Ֆրանսիայից վերադառնալուց հետո ՀՀ սփյուռքի նախարարաությունում նշանակվեցի Եվրոպայի հայ համայնքների վարչության պետ:

-Ինչպիսի՞ ծրագրեր է իրականցնում Եվրոպայի հայ համայնքների վարչությունը:

-Ինչ վերաբերում է վարչությանը, ապա ասեմ, որ այն ունի 5 աշխատակից, Արևմտյան և Արևելյան Եվրոպայի բաժինների պետեր, բաժիններում Էլ` մեկական աշխատակից: Վարչության ծրագրերը հիմնականում չեն տարբերվում նախարարության ծրագրերից, ուղղակի ավելի կենտրոնացած են Եվրոպայի հայ համայնքների շուրջ, և նախարարության ընդհանուր ծրագրերը մենք իրականացնում ենք Եվրոպայի հայ համայնքներում:

Վարչությունը բավականին լավ կարողանում է ապահովել տարածաշրջանի մասնակցությունը նախարարության ծրագրերին: Լինեն «Մեկ ազգ, մեկ մշակույթ», «Արի տուն» ծրագրերը, թե տարբեր համաժողովներ, կարողանում ենք հնարավորինս լավ տեղեկացնել համայնքին և ապահովել տարածաշրջանի մասնակցությունը:

Հիմնական և կարևոր ձեռքբերումը, որ եղավ այս տարի, երկու համայնքներում համակարգող խորհուրդների ստեղծումն Էր: Ֆրանսիայում կա երկրի ողջ հայ համայնքը ներկայացնող Ֆրանսիայի հայկակական կազմակերպությունները համակարգող խորհուրդ, որն օրինակելի կազմակերպություն է և ներառում է բոլոր կուսակցությունները, եկեղեցու երեք ճյուղերը. բոլոր հայկական կազմակերպությունները մեկական ներկայացուցիչ ունեն այդ խորհրդում:

Խորհուրդը, որը գործում է արդեն 15 տարի, ամեն տարի ընտրում է նախագահ, ով ներկայացնում է ամբողջ Ֆրանսիայի հայ համայնքը, ինչը մեծապես հեշտացնում է համայնքի հետ նախարարության աշխատանքը: Այս մոդելը փորձեցինք կիրառել այլ երկրներում նույնպես: Ի դեպ, ընթացիկ տարվա առաջին կիասամյակում հաջողվեց այդ մոդելն ստեղծել նաև Իսպանիայում` Բարսելոնում: Այդ կառույցին արդեն անդամակցում են մի քանի հայկական կազմակերպություններ, բայց դեռ անելիք կա` մյուսներին նույնպես միասնական համայնքային խորհուրդ բերելու համար: Տարվա երկրորդ կիսամյակում նույնը հաջողվեց ստեղծել Հոլանդիայում, որտեղ առանց կենտրոնացված խորհրդի աշխատող բավականաչափ հայկական կազմակերպություններ կան:

Առաջիկայում, ավելի կոնկրետ` նոյեմբերին, վարչության արդյունավետ աշխատանքի շնորհիվ Փարիզում կանցկացվի Եվրոպական բոլոր երկրների հայ համայնքների ղեկավարների ժողով, որտեղ ավելի կազմակերպված Եվրոպայի հայ համայնքը կսկսի աշխատել 2011 թվականի ծրագրերի ռազմավարության մշակման ուղղությամբ: Առաջիկա խնդիրներից մեկն այն է, որ եվրոպական այն երկրներում, որտեղ դեռ չի ճանաչվել Հայոց ցեղասպանությունը, համայնքների միասնական աշխատանքով հասնել ոճիրի ճանաչմանը: Նույն մոտեցումն են պահանջում նաև Լեռնային Ղարաբաղի Հանրապետության ճանաչման, Թուրքիայի և Ադրբեջանի հակահայկական քարոզչությանը հակահարված տալու և այլ կարևորագույն հիմնախնդիրների լուծումը:

-Ի՞նչ խնդիրներ ունի վարչությունը:

-Վարչությունը պրոբլեմատիկ ոչ մի խնդիր չունի, քանի որ Եվրոպայի հայ համայնքների հետ ամուր համագործակցության մեջ է: Բացի այդ, ընկերական կապերի և վստահության ներքո ենք աշխատում:

-Ինչպե՞ս կգնահատեք նախարարության երկու տարվա աշխատանքը:

-ՀՀ սփյուռքի նախարարության երկու տարվա աշխատանքը դրական եմ գնահատում: Կարծում եմ, որ նախարարությունը շատ արգասաբեր է աշխատել, որը ցավոք շատ քաղաքացիներ չեն նկատում:

-Ի՞նչ կմաղթեք երկու տարեկան նախարարությանը:

-Երկամյա նախարարությանը ցանկանում եմ նույն արդյունավետությամբ արտահայտվող աշխատանքով էլ ավելի ամրապնդել կապերը Սփյուռքի հետ` իհարկե չմոռանալով նաև Ղարաբաղը` մեր անբաժանելի մասը: Այսինքն` Հայաստան-Սփյուռք գործակցությունը վերածվի Արցախ-Հայաստան-Սփյուռք գործակցության: Կարողանանք իրոք Սփյուռքի 7 մլն. հայությանը համախմբել` միասնաբար հանդես գալու և համազգային խնդիրների լուծմանը հասնել` ողջ ներուժը օգտագործելով և նպատակ ունենալով Հայաստանի և Արցախի հզորացումը հօգուտ ողջ հայության բարօրության:


Աղբյուրը` hayernaysor.am