Ընդդիմադիր կուսակցության առաջնորդի հետ հրապարակում են գիշերել նրա որդին` Կարին Հովհաննիսյանը, «Ժառանգություն» խմբակցության պատգամավոր Արմեն Մարտիրոսյանը, կուսակցության մի քանի անդամներ, ինչպես նաև Հայ ազգային կոնգրեսի ակտիվիստ Վարդգես Գասպարին:
Չնայած գիշերվա ցրտին` ոստիկաններն արգելել են Րաֆֆի Հովհաննիսյանի համար վրան տեղադրել հրապարակում, և նա ստիպված է եղել գիշերն անցկացնել բաց երկնքի տակ:
«Ես վրանի պահանջ չեմ դրել, իմ իրավունքն է, և մեր համաքաղաքացիները, պատգամավորները պահանջը դրեցին, բերեցին վրանը, ոստիկանությունը արգելեց` առանց որևէ օրինավոր հղման: Այսօր եթե պատկան մարմինները ուզում են վերանայել այդ որոշումը, ես համարում եմ, որ դա իրենց է պետք, ոչ թե ինձ, ուզում են թույլ տալ, կօգտվենք իմ իրավունքից, բայց ես չեմ խնդրելու», - ասաց Հովհաննիսյանը:
Հարցին, թե իր կարծիքով ոստիկանները ինչո՞ւ չեն թույլատրել վրան տեղադրել, «Ժառանգության» առաջնորդը պատասխանեց. - «Ոստիկանությունը շատ անգամ օգտագործվում է որպես գործիք և ինքը զոհ է դառնում իշխանավորների անօրեն հրահանգների: Պարզ է` հանձնարարականների իրականացումը, դրա համար ես կարծում եմ, որ Ազատության հրապարակի ինքնությունը, տեղանքը, լիցքը նաև որոշ մարդկանց մտահոգության առարկա կարող է լինել»:
Ոստիկանությունից հրաժարվեցին «Ազատություն» ռադիոկայանին որևէ մեկնաբանություն տալ, թե ինչ պատճառով է արգելվել Ազատության հրապարակում ընդամենը մեկ վրան տեղադրելու ցանկությունը:
2008 թվականի մարտի 1-ի դեպքերից հետո, երբ ոստիկանները ուժ էին գործադրել Ազատության հրապարակում տեղադրված վրաններում քնած ցուցարարների նկատմամբ, Երևանի քաղաքապետարանն ու ոստիկանությունը տարբեր պատճառաբանություններով արգելել են ընդդիմադիրների բողոքի ակցիաները, ցույցերն ու հանրահավաքները:
Աղբյուրը` azatutyun.am
0 Response to 'Րաֆֆի Հովհաննիսյանին չեն թույլատրել վրանում գիշերել'
Publicar un comentario